Ángel Menéndez Blanco (Anxelu)

Anxelu, alcuñu lliterariu d'Ángel Menéndez blanco, ye l'autor de monologos más famosu d'Asturies. 

Naciera en 1899 en Pola L.lena. Mui de nenu treslladóse cola familia pa Santa Cruz de Mieres, onde va casar con Consuelo Cachero.

Cazador y pescador de sonadía, trabayó na minería dende los 13 años, na Sociedad  Hullera Española, pudiendo estudiar ná más que los estudios primarios, al tiempu que se dedicaba a escribir monologos y facer les sos interpretaciones. Maestru de maestros n’esti xeneru. Les sos actuaciones tienen el iniciu en 1929, gales benéfiques, velades y demás.

Miembru  activu del movimientu anarquista asturianu, participó na Guerra Civil col bandu republicanu. Al ocupar les tropes franquistes el Principáu fue adscritu como soldáu al bandu subleváu.

En 1935 pasa a vivir na villa de Mieres, onde reside hasta los 73 años. Fixa entós la última residencia en Xixón, onde muerre en 1987.

Amás d’autor destacáu, Anxelu  foi  un actor xenial, interpretando los sos propios monólogos, manteniéndose viva l’alcordanza de les sos actuaciones per toa Asturies, del más humilde salón de pueblu hasta'l Teatru Campoamor d'Uviéu y por escenarios de Galicia, Palencia y Lleón.

Les sos obres alcuéntrense espublizaes en delles recopilaciones,  siendo la más destacada Monólogos, poemes y teatru asturianu, espublizao por Ed. Trabe, en 1995, prologáu por Faustino F. Álvarez y Marcos del Torniellu, col epílogu del so fiu, Ánxel Menéndez Cachero, “Anxelu fiu”.

Nesti llibru atopamos un total de  74 monólogos y 3 obrines n’asturianu. Tamién cuenta con una coleición de diez semeyes, onde vemos a Anxelu, en pose de distintos personaxes en dellos monólogos (La excursión de Anxelu a Pravia, Les conquistes de Rufón el Pintu, Les tres chaquetes de Anxelu, Linón, Pachón a la caza del gorrión, Pa marruecos Celedonio y Un tratu sin condición) y una semeya de paisano. Puen servir estes semeyes pal estudiu de la construcción del personaxe del monologuista asturianu,

D’ente toles obres d'esti autor, asoleyaes equí, podíemos destacar les siguientes:

• Les tres chaquetes de Anxelu. Po’l esitu que siempre tuvo polos distintos interpretes, de los que podemos destacar  les creaciones de Martín Prado, Velino'l Rilu, Nel del Solo, al empar de la propia de Anxelu.
• Linón, monólogu onde la ironía ta usade de forma mui entelixente por parte l'autor. Pue destacase tamien la forma de interpretalu de Velino el Rilu.
• El piar de los páxaros, monólogu mui popular, fechu non solo por monologuistes  conocios, sino popular ente  los aficionaos a facelo en comides y fiestes de collacios. 
• Si el cuerpo siente emoción…  ya sabréis la solución,  monólogu onde la picardería y la inocencia, faen un  bon xuegu. Ye de destacar que ta nel repertoriu d'esti que escribe, Min  de les Pieces. 
• Hai que citar tamién El disparar de Tía Rita, Dos cazadores famosos, Disparu certeru, ente otros, por ser muestra de la so afición a la caza.

Pa terminar, de momentu, del Llistáu de llibru vieyu n'asturianu (1839-1981), de la Coleición d'Inaciu Galán y González, apaecen otres espublizaciones d'Anxelu, o ediciones onde se fala del so trabayu:

• Menéndez, Ángel, "Anxelu", Monólogos asturianos [El tiru por la culata, Un tratu sin condición, Les conquistes de Rufón “El Pintu” y ¿En qué pensaría Xuaca?],  Imprenta de Mieres, 4ª edición, Mieres, 1933. Inclúi dos semeyes del autor a parte. 
• Menéndez, Ángel, "Anxelu", Teatro Asturiano [Los consejos de Anxelu], Imprenta de Mieres, 4ª edición, Mieres, 1933. Trai'l poema de Marcos del Torniello dedicáu al autor. 
• Menéndez, Ángel, "Anxelu"; Teatro Asturiano [Viento, chubascu y mares, El rollu de Falu y Si non quies vete n’un flaco, procura comprar tabaco], mprenta de Mieres, 4ª edición, Mieres, 1933.
• Menéndez, Ángel, "Anxelu"; Teatro Asturiano [Siempre contigo, Mariyina] 3ª edición, ¿Mieres?, 1935.
• Menéndez, Ángel, "Anxelu", Monólogos asturianos [La excursión de Anxelu a Pravia y Pa Marruecos, Celedonio], 4ª edición, Librería Cultura, Mieres, 1948. (2 exemplares, unu d'ellos firmáu pol autor y con una fueyina volandera col poema “A la nobre tierrina”).  
• Menéndez, Ángel, "Anxelu", Monólogos asturianos [Un tratu sin condición, Manín el Cuba y Tristán echó una cana al aire], 5ª edición, Librería Cultura, Mieres, 1949. 
 

________________________________

Fontes: Ediciones Trabe, Wikipedia, Inaciu Galán y documentación personal.

Una notina de prensa

Armando, Casado, Cristina y Filadi

19/12/2011 a les 10:32:55 - Archivao en: dolfo

Dos nomes propios, un apellíu, una manera secreta de llamase… Los protagonistes deLes Puertes de Tanhauser son agora ellos… elles.

1.- Armando Felgueroso ye un portentosu actor, el secundariu robaescenes del meyor cine o teatru de cuando se facía bon cine o teatru, un artista cola escena a la vena… Escena que tien la necesidá de compartir, porque de los güeyos, de les oreyes, de les manes sálen-y tables, telones, focos… Y porque si nun lo comparte, revienta.

Armando Felgueroso ye de los artistes insustituibles, impagables, de la Compañía Asturiana de Comedias. Entra nel territoriu de los característicos necesarios en cualesquier formación. Podría protagonizar ensin problemes, talentu sóbra-y, y más agora cuando yá los corsés de lo que tenía que facer un galán adversus un secundariu yá tán más que superaos, pero'l tipu de teatru que sigue faciendo na mítica compañía obliga a qu'él tea ehí, nesa segunda fila gociosa que los espectadores avezaos persiguimos como llambedores, pa qu'esi teatru sía posible, siga esistiendo.

Pero non solo ello… Armando Felgueroso tien creao un monologuista, cásique nada,Min de les Pieces, quintasencia d'unu de los arquetipos dominantes nel discursu del monólogu popular asturianu: el del aldeanu buenón, campechanón pero, al tiempu, picardiosu y foín. Y Min de les Pieces axunta, con Pin de la Cotolla o Cellero, nun podium referencial de lo meyor que tien dao esa manifestación nel país. Min de les Pieces diz a la manera clásica, arrastrando y farfollando cuando fala pero dende la claridá; esparabaniando lo xusto, desfaciendo la llingua, deconstruyendo al antihéroe que los monologuistes como naide representen. Min de les Pieces recupera clásicos d'Anxelu, Delestal o Fabricio, recrea nuevos asuntos en reconocible autoría… y fixa discursu sobre'l so oxetu de trabayu, llabor que munchos nun faen. Armando Felgueroso sabe d'ónde vien, investiga… Y con tol voluntarismu del mundu (vivimos nun territoriu estúpidamente hostil pa los teatreros) ye quien a treslladar el so saber y la so esperiencia a esi espectador que lo quiera compartir. Tuvo esti día na ESAD, falando colos alumnos, llevando una conferencia espectáculu que me tocó conocer cuando tovía taba pa parise y Eladio de Pablo (el gran Eladio de Pablo) confírmame lo que yá sabía: que ye un espectáculu que tendría que dir aula per aula de la ESAD a la postrera escuelina d'esti país. Agora la pelota tendría tar nesos responsables educativos (del Principáu, de los Ayuntamientos…) que son tan daos a coleccionar artistes ensin ser quien (por nun saber ¿?) a utilizalos. Ver veremos.


2.- Casado. José Manuel Casado ye l'alma mater y pater (en xunto con Domingo, Ana Rosa…) de la Banda de Gaites de Corvera, ......




Y 3.- Cristina Muñiz y Filadi Curto firmen xuntes una novela ....

http://blogs.lesnoticies.com/dolfo_camilo/armando-casado-cristina-y-filadi/266

Un articulin

COMENTARIOS D'UN TEATRERU CRITICÓN
(d'El blogue d'un teatreru asturianu)

21/12/11

El monólogu asturianu sigún Armando Felgeroso.

 

Armando Felgueroso.

Si yá'l teatru asturianu tien bien de crítiques negatives, más fundamentaes en prexuicios personales y sociales que'en criterios culturales oxetivos, ún de los sos xéneros dramáticos destaca sobre cualisquier otru n'esti sen: el monólogu.

El monólogu asturianu fuera, ya inda ye anguaño, atacáu pola so actutú misóxina, sinon apediyáu direutamente de machista; pol usu desmedíu de pallabres groseres, de mal sonar al finu oyíu del bienpensante, y nun idioma non casteyanu, que sienta mal al meyorfaláu ilustráu; pola so probitú de formes llíriques en métrica y rima, que los alloñen de los cánones calderonianos ya lorquianos que marquen el buen gustu; pol so calter cómicu, que bien malo ye riise; y, sobre too, por considerar apropiaes temes de les clases sociales más baxes, ensin un enclín moralizante nin d'investigación antropolóxica. Pero estes crítiques queden solamente na piel de lo que significa'l monólogu na realidá asturiana, nun lleguen a la so cadarma porque nun-yos interesa a estos críticos rascar pa llegar dientro: conque-yos cuadre l'ideal col prexuiciu, d'aquello de que lo d'Asturies ye más rancio, más morralla, pior, yá-yos val.

Ensin embargu, el monólogu n'Asturies ye daqué más. Como pasa col teatru costumista, el monólogu cumplía una función social de divertimientu y de comunicación social, de tresmisión de los arquetipos tradicionales y privativos de la sociedá, d'una mena divertida y cercana al estratu social que-y afectaba: el pueblu llanu.

Y dende'l pueblu llanu apaez Armando Felgueroso, compañeru de la Compañía Asturiana de Comedies, y monologuista al dar vida a dos personaxes, al modernu James Corigos, un esplorador de la realidá convencional actual, y a Min de les Pieces, paisanu de siempre, de boina, xilecu y faxa y, ensin dubia'l más interesante pa mín.

Min de les Pieces en dos momentos del espectáculu

Tuve la oportunidá d'acompañar a Armando nuna charra-espectáculu que dio pa una docena de privilexaos na Escuela Superior d'Arte Dramáticu y Profesional de Danza de Xixón, el xueves día 15. Ellí nos mostró'l significáu del monólogu asturianu, la diferencia pa frente a otres muestres individuales d'espresión dramátiques non asturianes, les temes a tratar, la so diferenciación al traviés del tiempu (y tamién del sexu y la edá del intérprete), los preseos d'apoyu, l'usu correctu d'onomatopeyes nel discursu, los autores históricos y, sobre too, los diferentes personaxes y la forma de creyalos. Y, ente argumentu y argumentu, apaecía Min de les Pieces pa sofitar caún coles interpretaciones de monólogos de Marirreguera, Anxelu, Arsenio Rodríguez, el Maestru o Arsenio González (col que tuve la suerte de compartir escañu).

Nun sé si-yos quedara claro a unos estudiantes del centru qué yera una guiá o un tratante, porque nun taben avezaos a la cultura asturiana tradicional, nin qu'aquello que Min ufiertaba como rei yera, en realidá, el ñudu d'un chisqueru faciendo les vegaes de panoya colorada, porque dame que tampoco nun taben avezaos a la realidá hestórica de más p'allá de veinte años.

Pero de lo que nun tengo nin un rispiu dulda ye que, gracies a les desplicaciones d'Armando, quedó-yos nidio cómo hai que construyir un personaxe de monólogu: que tien que conocer la realidá que pise, p'averala al públicu y faer que se identifique col tipu, y caricaturizala dempués, pa poder xugar colos estremos que, faciéndolos de so, denuncia. D'esta miente, la xente que les siente, ye capaz de dixebrar ente qué ye válido pa la vida en común y qué ye lo qu'hai que dexar pa prau.

Solo aquel que furrula dende prexuicios (los que falaba enantes) ye incapaz d'alcontrase cómodu nel xuegu de los arquetipos llevaos al esperpentu. Poro, verá machismu nuna sociedá matriarcal (porque lo desconoz, porque nunca nun se detuvo a averigüalo o, si lo fizo, enterrólo porque nun-y cuadraba col prexuiciu) y escandalizarase poles groseríes, estremarase pol usu de les fórmes líriques cencielles y de riirase del idioma tradicional y propiu'l país, ensin figuarse que son trés fórmules bien articulaes pol monólogu asturianu dende abondo p'acaparar l'atención del públicu a quien van dirixíu.

Adolfo Camilo Díaz escribía nel so blogue de "Les Noticies", Les puertes de Tannhäuser (Armando, Casado, Cristina y Filadi, 19-XII-11), ente otros, sobre Armando, del apreciu profesional que-y tien (del personal, tanta buena pallabra déxalu nidiu), de lo gran monologuista que ye y d'esti proyeutu sobre'l monólogu asturianu. Yo, confírmolo puntu por puntu.

Armando Felrgoroso y el so alter ego "Min de les Pieces", xunto a otros como Cellero o Pin de la Cotolla, tan dignificando el monólogu asturianu col so trabayu d'espardimientu que, nun podía ser d'otra manera, avérase al públicu asturianu cola fórmula de siempre: una idega acompañada d'una sonrisa.

PRESENTACIÓN

Dizse perhí, que quien nun ta n'internet, que nun ta en dengún sitiu. Pos bien esti blog faise pa que-y quede claru al mundu enteru qu'el "MONÓLOGU ASTURIANU"  ta ehí y tamién esiste. Pue dicise que ye como una deuda pendiente que tengo con esti xéneru literariu e interpretativu. Pa ello, voi intentar plasmar equí unes cosines referíes al MONÓLOGU: actuaciones, crítiques, biografíes..., y too aquello que se me ocurra, que pueda ser d'interés pa cualisquier interasáu/ada en saber más y conocer meyor esti xeneru tan de nuestro.

Un saludu pa toos vosotros.